Delito de falsidade en documento público
Sobre as 00:05 horas do día 17 de outubro, unha patrulla do Grupo Operativo Nocturno da Policía Local de Lugo, de servizo no Polígono das Gándaras, como integrante do operativo establecido como consecuencia dunha “kedada”de vehículos publicitada en redes sociais, observa a circulación dun turismo que presenta unha placa de matrícula dianteira de diferente numeración que a posterior.
Dáse o “alto” ao condutor comprobando como a placa de matrícula instalada na parte dianteira corresponde ao vehículo e a traseira corresponde a outro vehículo propiedade do seu pai.
Compróbase así mesmo que o vehículo carece de Seguro Obrigatorio de Automóbiles e ten a ITV caducada e curiosamente a placa colocada na parte posterior, que corresponde a outro vehículo, si ten seguro e ITVen vigor.
Por tal motivo instrúense dilixencias para o Xulgado de Garda por un delito de falsificación en documento público, sendo retirado o vehículo para o Depósito, onde queda inmobilizado, abrindo expediente sancionador por circular carecendo de seguro obrigatorio (sanción de 1.500 euros) e por non presentar o vehículo á Inspección Técnica periódica no prazo debido (sanción de 200 euros).
Subtracción de vehículo de motor
Na tarde do día 19 de outubro, por efectivos da Unidade Territorial de Policía de Barrio, procedeuse á detención dun individuo nacido no ano 1971, como autor dun delito de furto de uso de vehículo de motor.
Os feitos sucederon cando o agora detido preséntase nesta Xefatura de Policía Local para facer entrega dun vehículo, pois o pasado luns día 12 de outubro apoderouse del cando estaba estacionado nunha rúa da cidade, utilizándoo durante unha semana e agora quería devolvelo.
Manifesta que viu o coche estacionado coas chaves dentro e decidiuse a collelo e usalo, descoñecendo quen é o seu propietario.
Os axentes comprobaron que o titular do vehículo presentara denuncia por subtracción, motivo polo cal foi detido e trasladado a dependencias policiais onde se instrúen dilixencias para o Xulgado de Garda.
Delito contra a seguridade
Sobre as 17:45 horas do día 16 de outubro, o equipo de Atestados da Policía Local de Lugo desprázase ao Paseo do Rato, á altura dun restaurante alí situado, onde un condutor chocara contra tres vehículos estacionados en batería.
Devandito condutor presenta signos de embriaguez polo que é sometido ás probas de detección alcohólica arroxando un resultado POSITIVO de 0,67 mg/l, motivo polo que se instrúen dilixencias por delito contra a seguridade viaria, na modalidade de Xuízo Rápido.
Control medidas COVID-19
Durante a fin de semana do 17 e 18 de outubro, efectivos do Grupo Operativo Nocturno da Policía Local de Lugo, levaron a cabo un dispositivo para o control do cumprimento das normas da Consellería de Sanidade da Xunta de Galicia, como consecuencia da situación derivada do COVID-19, levantando CINCO actas denuncia por infracción á Lei de Saúde de Galicia por detectar outros tantos locais de hostalaría da cidade que incumprían o horario establecido fixado para as 1:00 horas.
Os locais denunciados sitúanse na praza de Augas Férreas (2), Campo Castelo (2) e Bolaño Rivadeneira.
Así mesmo denunciouse un local de hostalaría, situado na rúa Lavandeira, por superar o aforo establecido do 50%.
Tamén se levantaron dúas actas a cidadáns que transitaban pola vía pública sen facer uso da máscara e sen atoparse en ningunha das causas de exención contempladas na Real Decreto Lei 21/2020.
Auxilio á cidadanía
Sobre as 11:00 horas do día 18 e outubro, unha patrulla da Unidade Territorial de Policía de Barrio da Policía Local de Lugo, é comisionada pola Sala do 092 para que acuda á rúa Montero Ríos xa que unha persoa esborrallouse na porta dun establecemento.
Os axentes comproban como un home está tendido no chan e un cidadán está a practicarlle as manobras de reanimación, polo que un dos policías releva a esta persoa e continúa coas manobras de reanimación cardiopulmonar, ata que o home comeza a respirar novamente, momento no que chega ao lugar unha ambulancia medicalizada na cal o trasladan ao HULA, manifestando o facultativo que puido deberse a un fallo vascular, informando os axentes á familia.
Rescate dun animal
Sobre as 10:45 horas do día 17 de outubro, unha patrulla da Unidade Territorial de Policía de Barrio acode á Urbanización As Regas, xa que ao parecer un gato estaba sobre un farol e non era capaz de descender. Os axentes ao comprobar este feito, requiren a presenza dunha dotación de Bombeiros, procedendo a recoller o gato e ao comprobar que carecía de microchipdeixouse en liberdade.