Seguridade cidadá

Na tarde de onte, unha patrulla da Unidade Territorial de Policía de Barrio da Policía Local de Lugo é comisionada pola Sala do 092 para que se traslade a unha rúa da zona norte da cidade, xa que ao parecer un home estaba a golpear cun mazo un bolardo.

Os axentes preséntanse de inmediato observando que un bolardo estaba totalmente torcido con golpes recentes e a base de cemento rota e outro bolardo que xa desaparecera, sendo identificado un home que manifestou ser autor destes feitos, alegando que golpeara cunha marra o bolardo coa intención de rompelo e sacalo de alí, xa que lle dificultaba o xiro para entrar na súa propiedade, engadindo que o outro bolardo achábase no interior da súa leira, levantando acta dos danos ocasionados para a súa remisión á Autoridade competente.

No transcurso desta intervención obsérvase que dun local próximo saen dous mozos, que proceden a increpar aos axentes, motivo polo cal se procede á súa identificación, negándose reiteradamente, polo que son informados que en caso de persistir na negativa serían conducidos a dependencias policiais para a súa completa identificación, momento no que se identifican, levantándose acta de denuncia por dúas infraccións á Lei de Seguridade Cidadá, por faltar ao respecto a axentes da autoridade no exercicio das súas funcións e por negativa a identificarse, esta última de carácter GRAVE, que leva aparellada sanción de até 30.000 euros.

Auxilio á cidadanía

Na madrugada do día 25 de abril unha patrulla do Grupo Operativo Nocturno da Policía Local de Lugo acode a unha vivenda da zona norte da cidade, onde unha persoa caera e non podía incorporarse, sendo auxiliada polos axentes que a incorporan deitándoa na cama, rexeitando asistencia médica e quedando ao cargo dun familiar.