A edil de Gobernanza, Paula Alvarellos, anunciaba hoxe a incorporación de 6 auxiliares administrativas a catro departamentos municipais.

“Dende esta mesma semana unha delas xa se atopa traballando no servizo de Estatística e outra no de Licenzas e para mañá se agarda a entrada de dúas máis, unha para Rexistro e outra para Servizos Sociais, ás que haberá que engadir outro reforzo igual (2 auxiliares administrativas unha para Rexistro e outra para Servizos Sociais) o luns”, explica a concelleira que indicou que se trata de persoal interino que foi requirido a través das listas habilitadas, ao respecto, pola administración local.

“Con esta medida, impulsada dende a área de Gobernanza, o que queremos é fornecer distintas áreas municipais, independentemente da súa dirección política, para paliar a carga de traballo e axilizar todas as tarefas que teñen encomendadas e que son de gran importancia para a tramitación administrativa e a resolución das demandas cidadáns”, explicou Paula Alvarellos, asegurando que “a dotación dos novos efectivos está a permitir o desbloqueo do Rexistro Municipal”.

A responsable de Recursos Humanos salientou tamén que nesta semana tomaron posesión cinco funcionarios de carreira, un peón especialista e catro Oficiais Maquinista Fontanero que, neste caso, serán derivados á Unidade de Augas para mellorar o seu funcionamento.