Accidentes de circulación
Durante a xornada do luns día 17 de agosto os axentes da Unidade de Atestados foron requiridos para intervir en cinco accidentes de circulación, ocorridos no centro urbano.
O primeiro deles sucede na Avd. Infanta Elena, na glorieta que enlaza co centro comercial As Termas, véndose implicados dous automóbiles e resultando só danos materiais. Minutos máis tarde, os axentes son requiridos na confluencia das rúas Concello e Sierra de Outes, tamén por colisión entre dous vehículos. En ambos os casos, os policías colaboran cos condutores implicados no enchemento do parte europeo de accidente, para dar coñecemento ás súas respectivas compañías aseguradoras.
Ás 14’30 horas comunícaselles que un automóbil causou danos no muro perimetral da escola de piragüismo “Brétema”, ausentándose do lugar. Os policías recollen datos achegados por varias testemuñas e inician as investigacións necesarias para a identificación e localización do causante dos danos.
Tamén se atenden accidentes na rúa Santiago (Volta da Viña), Rúa Industria e Benigno Rivera, na súa confluencia con Infanta Elena, saldándose cada un deles con dous vehículos implicados, só con danos materiais e con declaración amigable por parte dos implicados.
Ás 20’20 horas recibiuse aviso, na Sala do 092, sobre un accidente de circulación ocorrido na Avd. Benigno Rivera, no seu tramo procedente da incorporación desde a A6 (dirección Madrid).
Debido a que, segundo a información recibida, como consecuencia do accidente, producíronse importantes danos materiais e posiblemente feridos, ademais de quedar afectadas ambas as calzadas da vía, desprázanse ao lugar os axentes da Unidade de Atestados, con apoio de unidades da Unidade Territorial de Policía de Barrio.
Unha vez no lugar, os policías proceden a asegurar a zona, sendo necesario cortar nalgún momento o tráfico rodado en ambos os sentidos de circulación, mentres se repoñía a zona destinada ao tráfico rodado a un estado apto para o tránsito, xa que sobre o pavimento quedaran esparexidos restos do vehículo e líquidos procedentes do mesmo, así como desprazados varios dos elementos que compoñen a mediana central divisoria de calzadas.
Durante os traballos propios da inspección ocular, recollida de datos e etc…, o condutor do automóbil, un home novo, que declarou que tentara recuperar o control do vehículo cando este comezou a deslizarse sobre o pavimento, pero que lle foi imposible, foi atendido polo Servizo do 061, resultando, aparentemente, sen lesións de gravidade.
Para restaurar a seguridade na zona foi necesaria a intervención de varios servizos municipais, sendo ademais de gran importancia a colaboración dun particular que neses momentos circulaba polo lugar co seu camión e, sen previo requirimento, ofreceu a súa cooperación aos axentes para a retirada da calzada dos elementos da mediana que se desprazaron sobre o carril de circulación, actuación que este corpo policial quere agradecer publicamente.
Caída de parte dun balcón sobre a vía pública
Ás 21’50 horas, unha patrulla da Unidade Territorial de Policía de Barrio desprázase á rúa Isaac Díaz Pardo, xa que se recibiu información de que parte do balcón dun inmoble caera sobre a beirarrúa. Acudidos de inmediato no lugar, os axentes comproban que parte do chan de pedra do balcón dun edificio caera sobre a beirarrúa, existindo perigo de caída de máis elementos, motivo polo cal se procedeu a acordoar a zona, quedando provisionalmente cortado o tránsito peonil por esa beirarrúa.
Fume no interior dun edificio
Ás 19’50 horas mobilízase unha patrulla da Unidade Territorial de Policía de Barrio en cálea Cantigas e Flores, xa que a Sala do 092 recibira aviso da existencia de abundante fume no rellano da segunda planta dun edificio da devandita rúa. Acudidos de inmediato no lugar, acompañados dunha dotación do Servizo de Extinción de Incendios, realizan unha inspección ocular do inmoble, podendo localizar a orixe do fume, que non era outro que un recipiente de cera para depilar que a moradora dun dos pisos deixara demasiado tempo a quentar.
Requirimento cidadán por persoal sanitario de recepción sen máscara
Ás 20’30 horas, un cidadán require a presenza policial nun centro sanitario da cidade, xa que, segundo el, o persoal de recepción e información do devandito centro non fai uso da máscara obrigatoria en ningún momento, nin sequera cando interactúa cos cidadáns; que tenia instalada un biombo protector pero que a subían para falar con quen ía a solicitar información.
Unha vez no lugar, os axentes comproban a veracidade da información, procedendo á identificación do traballador, que manifesta non recibir ningunha directriz da dirección do centro sobre o uso da máscara, aínda que lles dotaban de biombo protector.
Os axentes infórmanlle de que, segundo a normativa vixente, toda persoa maior de seis anos virá obrigada ao uso de máscara en todo momento, tanto cando estea en vía pública e en espazos ao aire libre como cando estea en espazos pechados de uso público ou que se atopen abertos ao público, aínda que se poida garantir a distancia de seguridade interpersoal, salvo que se atope nalgunha das excepcións regulamentadas; por todo o cal se dará conta á Consellería de Sanidade, para a tramitación do correspondente expediente sancionador.
Molestias en establecemento por clienta e follas de reclamación
Ás 12’30 horas do día 17 recíbese unha chamada telefónica, na Sala do 092, na que se informa de que unha clienta atópase causando molestias nun establecemento da Praza Maior. Se comisiona no lugar unha patrulla da Unidade Territorial de Policía de Barrio, cuxos compoñentes contactan coa requirente, que lles informa de que outra muller, que se atopa no exterior do local, chegara increpándoa e esixíndolle que lle devolvese o importe dun bolso que comprara facía tres anos, sen que presentase sequera o comprobante da compra.
Postos ao fala coa clienta, esta manifesta que naquel establecemento nunca daban comprobante de pago, pero que desexaba realizar a reclamación, sendo informada polos policías do procedemento, a través das follas de reclamacións que lle facilitan no establecemento nese momento, quedando en cumprimentalas e entregalas máis tarde.
Auxilio a viandante indisposta
Sendo as 11’30 horas do día 17 unha patrulla da Unidade Territorial de Policía de Barrio é requirida por unha peón que manifesta que hai unha muller sentada na beirarrúa, a uns metros de distancia, e que ten a roupa manchada de sangue á altura da zona xenital.
Os policías contactan inmediatamente coa devandita muller, que manifesta traballar nas inmediacións e que, cando saía de traballar, comezou a sangrar abundantemente e a marearse, motivo polo cal sentou no lugar e realizou unha chamada telefónica ao 112.
Os axentes comproban que se activou o servizo de emerxencia sanitaria e permanecen coa muller ata a chegada dunha ambulancia do 061, que presta unha primeira asistencia e posteriormente traslada á muller ao HULA.