Lara Méndez traslada a Rueda a disposición do Concello a cederlle á Xunta máis terreos para as novas dotacións sociais e de maiores solicitadas pola veciñanza do Sagrado Corazón

A alcaldesa enviou unha carta ao mandatario galego ofrecéndolle a posibilidade de incluír este extremo no convenio que se asinará para construír a nova instalación sanitaria do barrio, aproveitando a extensión da superficie permutada con Afundación.

A rexedora amosa así o apoio da Administración local ás peticións cidadás que reclaman á Consellería de Política Social a creación na zona dun centro de día e outro sociocultural, alén dunha residencia de maiores.

Sábado, 30 de decembro de 2023
Fonte: 
Gabinete de Prensa
Lara Méndez traslada a Rueda a disposición do Concello a cederlle á Xunta máis terreos para as novas dotacións sociais e de maiores solicitadas pola veciñanza do Sagrado Corazón

A alcaldesa de Lugo, Lara Méndez, vén de remitir unha carta ao presidente da Xunta, Alfonso Rueda, trasladando a disposición do Concello para ceder a totalidade dos terreos permutados con Afundación no Sagrado Corazón (5.764’59 m²) co fin de que o Executivo autonómico poida construír neles, alén do centro de atención primaria comprometido polo Sergas, o resto de dotacións que reclama a veciñanza da contorna.

“Sendo coñecedores das necesidades comunicadas dende a Asociación Porta de Lugo, que demanda da Consellería de Política Social – por ser súas as competencias nesta materia - a creación dun centro de día e doutro sociocucultural, así como dunha residencia de maiores e dependentes, entre outras reivindicacións, quero transmitirche persoalmente a nosa absoluta colaboración para cedervos máis chan do inicialmente reservado ao centro médico (1.534 m²) co obxectivo de que, así, lle poidades dar resposta tamén a estas peticións cidadás, que esta Alcaldía apoia na súa totalidade ao entender que son realmente necesarias para atender á poboación do barrio, moi envellecida”, indicaba Méndez.

Na súa misiva, a mandataria lucense apelou, alén, ao labor conxunto entre organismos públicos, “que debe ser unha máxima de todas as Administracións, e o mesmo que conseguimos dar pasos para recuperar a área do antigo hospital no barrio da Residencia, seguro que, se hai vontade, poderemos seguir traballando en colaboración para revitalizar da mesma maneira o Sagrado Corazón con estes novos servizos”.

Deste xeito, Lara Méndez ofreceu ao dirixente galego a posibilidade de recoller xa no convenio que se asinará para construír as novas instalacións sanitarias este incremento de superficie, formalizando así o compromiso de ambas as dúas Institucións.

“Quedamos á espera das vosas noticias para modificar o borrador do acordo, xa elaborado, e incluír no mesmo este extremo, o que suporía continuar avanzando na rexeneración completa desta parte da capital que experimentará un gran revulsivo coa creación, por parte do Adif e do Concello, do paso de cidade que se habilitará coa Estación Intermodal”, concluíu a alcaldesa.

Noticias relacionadas