Paula Alvarellos, acompañada de Ladislao Real e Emilio Ruíz, presentou esta mañá o evento que reunirá a 34 equipos de 12 provincias de todo o país.
A rexedora subliñou que “Lugo convertirase durante tres días no epicentro do mus nacional” e destacou “a repercusión económica desta cita para o municipio”.
A competición, organizada pola Federación Española de Asociacións de Mus, dará comezo este venres, ás 20:00 horas, no Hotel Mendez Nuñez "Salón Almirante Planta 1".
Máis de 400 xogadores de toda España participarán esta fin de semana en Lugo no II Campionato Nacional de Mus por equipos. A alcaldesa de Lugo, Paula Alvarellos, acompañada por Ladislao Real e Emilio Ruíz, representantes da organización, presentaron esta mañá a segunda edición deste torneo que reunirá a 34 equipos procedentes de diversas provincias como Asturias, Segovia, Madrid, Ourense, A Coruña, Lugo, Pontevedra, León, Navarra, Bizkaia, Álava e Cantabria.
Alvarellos mostrou a súa satisfacción polo feito de que “Lugo se converta durante tres días no epicentro do mus nacional, acollendo un campionato que reunirá a un importante número de afeccionados e xogadores deste tradicional xogo de cartas”. Neste senso, agradeceu aos organizadores “que tiveran escollido a nosa cidade para albergar a segunda edición deste torneo, que de seguro superará o éxito da primeira, consolidando este campionato como unha cita ineludible para os afeccionados a este xogo”.
A rexedora subliñou, así mesmo, a repercusión económica desta cita, coa que colabora o Concello, para o municipio, especialmente para o sector da hostalería: bares, restaurantes, hoteles, e o comercio, así como do transporte de pasaxeiros.
A competición, organizada pola Federación Española de Asociacións de Mus, dará comezo este venres, a partir das 20:00 horas, no Hotel Mendez Nuñez "Salon Almirante Planta 1" e prolongarase ata o domingo. Desenvolverase baixo un sistema de 3 ceros, proporcionando unha emocionante dinámica de xogo que garante intensas xornadas de Mus. Os equipos que queden eliminados terán a oportunidade de seguir competindo nunha fase de parellas ao KO, asegurando así que o espírito competitivo se manteña vivo durante toda a fin de semana.
“Este evento non é só unha competición; é unha celebración do Mus, un deporte que combina estratexia, psicoloxía e, por suposto, un bo ambiente entre os participantes”, explicaron os representantes da organización.
Ademais, o campionato en Lugo ten un valor engadido este ano, xa que entre os premios para outorgar inclúense prazas para o Campionato de España de Mus que se celebrará en Ponferrada en setembro deste ano. “Isto engade un aliciente extra para os participantes, que non só buscan a honra de gañar en Lugo, senón tamén asegurar a súa presenza na competición de Ponferrada”, apuntaron.
No acto de presentación tamén participou a concelleira de Relacións Institucionais, Lara Méndez, e o deputado, Miguel Fernández. Ao rematar a presentación, a organización do campionato tivo un recoñecemento cara as administracións colaboradas, o Concello e a Deputación, así como co principal patrocinador privado, Cafés Candelas, coa entrega dunha mosqueira de cerámica.