Ángeles Novo imparte estas charlas, que se celebrarán todos os mércores ata o 7 de outubro, a través do Facebook de Xuventude de Lugo
O ciclo de masterclass online de nutrición que puxo en marcha a área de Xuventude continúa mañá cunha sesión que afondará en diversos trucos para non caer nin sucumbir a antollos.
A dietista-nutricionista Ángeles Novo é a encargada de dirixir este ciclo, que contempla distintas charlas, de xeito telémático, coas que o Concello busca ofrecer aos rapaces e rapazas educación nutricional e crear unha contorna saudable, dado que, cada vez máis, as persoas mozas estanse desligando da dieta mediterránea e a inxesta de alimentos locais ou de tempada estase vendo diminuída en detracción dos produtos ultraprocesados e a comida precociñada.
Estas masterclass terán lugar todos os mércores ata o 7 de outubro, ás 12:30 horas en agosto e en setembro e outubro ás 20:00 horas, a través do Facebook de Xuventude de Lugo.
Nas vindeiras semanas trataranse os mitos nutricionais, como mellorar o sistema inmune coa alimentación, almorzos, ceas e picoteos saudables e receitas doces.