O comercio local facturou, nos primeiros dez días de funcionamento da plataforma online municipal Abrindo Lugo, 14.360 euros. Unha cantidade que xa lles foi abonada ás empresas cumprindo o principal obxectivo desta iniciativa impulsada polo goberno de Lara Méndez: dotar de liquidez aos negocios pese a permanecer pechados durante este tempo de confinamento.

Dende a súa posta en marcha, preto de 200 establecementos da cidade se adheriron á campaña “Cos de Sempre” que o Concello puxo en funcionamento da man da Federación de Comercio e da Asociación Provincial de Empresarios de Hostalaría de Lugo, para fomentar a compra anticipada online mentres dure o Estado de Alarma.

En total, os locais participantes venderon, en pouco máis dunha semana, preto de 400 bonos con descontos que oscilan entre o 15 e o 40% e que se poderán consumir unha vez reabran as súas portas. Así mesmo, nestes 10 días xa se recadaron máis de 360 euros a través de tickets solidarios, cos que a cidadanía está a axudar ao pequeno comercio sen comprar ningún produto ou servizo.

Algúns dos comercios que máis bonos venderon foron os relacionados coa hostalaría, con casos concretos que alcanzaron os 500 e 600 euros de venda pero tamén as tendas de agasallos que ingresaron preto de 900 euros ou as perruquerías cun volume de negocio de 400 euros.

O edil de Desenvolvemento Local e Emprego, Mauricio Repetto, agradeceu a colaboración da veciñanza e o seu compromiso “cos de sempre, cos negocios e establecementos que frecuentamos, nos que confiamos e cos que agora é importante que todos nos impliquemos, administración e sociedade, para que a súa reactivación sexa máis rápida” ao tempo que sinalou a importancia das vendas realizadas nesta época, independentemente da súa contía, “porque a pouco que sexa, axudará a facer fronte aos gastos permanentes que teñen as pequenas empresas”.

As inscricións para establecementos interesados continúan abertas a través de www.abrindolugo.gal no espazo habilitado na parte superior da web.

A través da web Abrindo Lugo os veciños e veciñas poderán adquirir tíckets ou bonos nas tendas, restaurantes, bares e demais establecementos participantes, que serán trocados cando remate a situación de crise sanitaria. Así mesmo, para efectuar a compra non é preciso rexistrarse, aforrando tempo e facilitando o proceso.

A campaña Cos de Sempre se desenvolve dende a área de Desenvolvemento Local e Emprego, baixo a marca Lugo É Capital, que aglutina todas as accións do Goberno de Lara Méndez en apoio á economía de proximidade.

Audio

• O edil de Desenvolvemento Local e Emprego, Mauricio Repetto, fai balance dos 10 primeiros dias do "Abrindo Lugo" | Descargar mp3