A Fase XVII do Plan de Rehabilitación do recinto amurallado, sufragada con fondos europeos, mobilizará preto de dous millóns de euros para as intervencións.
Con estas achegas, 35 vivendas reducirán entre o 30% e o 45% o seu consumo de enerxía primaria non renovable, mentres que 12 acadarán unha diminución entre o 45% e o 60% e 10 inmobles máis do 60%.
Estas actuacións se suman ás xa realizadas até o momento noutras 636 edificacións.
A alcaldesa, Lara Méndez, incide no seu compromiso permanente por humanizar e recuperar todos os barrios de Lugo. “A mellora urbanística que se proxecta redundará tamén na dinamización comercial e social da contorna”, afirmou.
A alcaldesa, Lara Méndez, anunciou esta mañá que o Concello de Lugo aprobará esta semana, en Xunta de Goberno, a Memoria, correspondente á Fase XVII, do Programa de Rehabilitación no Centro Histórico da cidade, ao abeiro das axudas do Plan de Recuperación, Transformación e Resiliencia financiado pola Unión Europea – Next Generatión.
Nesta convocatoria, - que como até o de agora se xestionará dende a Empresa Municipal de Vivenda e Solo (EVISLUSA) - o Executivo local proxecta rehabilitar un total de 57 vivendas, ubicadas no recinto amurallado.
A colaboración suporá un desembolso total de 1.960.691 euros, dos que o Ministerio de Transportes, Mobilidade e Axenda Urbana asumirá 997.311 €, o Concello 239.412 € e os promotores particulares 723.967 €
A rexedora explicou que, “con estas achegas, 35 inmobles poderán reducir entre o 30% e o 45% o seu consumo de enerxía primaria non renovable, mentres que 12 acadarán unha diminución de entre o 45% e o 60% e 10 edificacións rebaixarán a súa demanda de enerxía por riba do 60%”.
Dende o seu orixe, estas axudas levan contribuído a impulsar a reforma de 636 vivendas (354 nas seis primeiras fases e 282 máis ata a 14 edición) e máis dunha vintena atópanse en tramitación.
A rexedora manifestou o compromiso permanente e absoluto do Goberno municipal por continuar avanzando na humanización e dinamización de todos e cada un dos barrios de Lugo.
“No caso do recinto amurallado, esta obedece a unha recuperación urbanística pero tamén comercial, a través dos viveiros municipais que impulsamos na Tinería e coa que tamén quixemos corrixir a degradación social que lle afectaba á zona. Unha mellora que se fará máis evidente cando conclúan tamén as obras de peonalización proxectadas na contorna e que xa se atopan en curso”, incidiu Lara Méndez.
Audio
- A alcaldesa de Lugo, Lara Méndez, sobre a Fase XVII de Rehabilitación do Centro Histórico | Descargar mp3