O Museo Interactivo da Historia de Lugo (MIHL) acolle ata finais do vindeiro mes de agosto unha exposición coas obras premiadas na Bienal de pintura do Eixo Alántico. Este concurso pictórico, destinado a obras inéditas, comezou a súa andanza coa súa primeira edición no ano 1997. Dende entón, a exposición itinerante da Bienal percorre a xeografía de Galicia e Portugal. Precisamente, a finais deste ano celebrará unha nova edición tendo como sede a cidade de Lugo, que acollerá unha exposición das obras que se presenten ao certame.

A Bienal de pintura do Eixo Atlántico é un espazo de promoción e intercambio de novas creadoras e creadores do noroeste peninsular. Nesta ocasión, a cidade de Lugo alberga unha retrospectiva de obras premiadas no certame ao longo das súas últimas trece edicións. A exposición pode contemplarse, totalmente de balde, no MIHL ata o vindeiro 31 de agosto, todos os días en horario de 10:00 a 14:00 horas e de 16:30 a 20:30 horas.

Esta exposición forma parte da programación posta en marcha polo goberno de Lara Méndez con motivo da Capital da Cultura do Eixo Atlántico. Toda a información sobre esta iniciativa, así como do resto de actividades, como horarios, datas, etc., pode consultarse na páxina web www.lugocapitaldacultura.com.

“Conscientes de que a cultura ocupa un lugar central na construción e desenvolvemento da Eurorrexión e do seu sistema urbano, a Bienal de Pintura do Eixo Atlántico constitúe un dos programas máis queridos, de maior éxito e participación”, subliñou a rexedora lucense Lara Méndez, quen engadiu que “este programa, con xa máis de 20 anos, estimula a creación artística, posibilitando simultáneamente o intercambio cultural e o coñecemento de artistas, que no noroeste peninsular constitúen unha contribución extraordinariamente viva e dinámica no panorama cultural europeo”.