O Museo Interactivo da Historia de Lugo acolle dende este próximo xoves 9 de abril a exposición Arte con Agri-cultura, Ponme de terre, A Pataca do artista lucense Paco Pestana.

Trátase dunha intervención artística nun dos xardíns interiores do MIHL que pretende ser segundo o autor “un acto de amor infinito co tubérculo e o escarabello”. Para que esta exposición viva se poida levar a cabo creouse no xardín interior un cultivo con máis de 200 kilos de patacas Kennebec que serán tratadas e coidadas polo artista nos sucesivos días para que ramifiquen de forma poética e busquen a luz da superficie ata morrere e quedarse secas como pasas.

Nesta exposición, Paco Pestana, botará uns “regos” de patacas artísticas no MIHL non para comelas senón para mirar para elas e lembrar quen somos, porque os galegos por moi urbanitos que sexan teñen un pé nas leiras, nas chousas, e nas hortas.

Ademais, acompañando á intervención van textos sobre a pataca e o escarabello do propio artista asi como frases de distinguidas eminencias como Marlon Brando, Garcia Lorca, Picasso, Santa Teresa de Jesús, Sócrates, Napoléon ou Brigitte Bardot sobre o tubérculo.

Folleto Paco Pestana