O Concelleiro de Deportes e Medio Rural, Miguel Fernández, o director comercial de Caixa Rural, José Manuel López, e o coordinador de eventos deportivos do Concello, Gonzalo Pereira, presentaron a 17 edición do Circuíto de carreiras populares Larsa Corre con nós, que conta co apoio de distintos colaboradores.

Na presentación, Miguel Fernández fixo fincapé en que “este segue sendo o único circuíto de probas atléticas gratuíto en Galicia, que ademais nesta edición preséntase con moitas novidades para favorecer a participación, a familiaridade e o divertimento”. O edil tamén destacou que “xa está aberto o prazo para inscribirse nesta nova tempada de carreiras populares, na que xa van preto dun milleiro de atletas inscritos, o que é unha boa mostra do éxito que, ano tras ano, acada cada unha das edicións”.

Pola súa parte, Gonzalo Pereira explicou que “mantemos as bases que sustentaron o éxito dos anos anteriores introducindo novas clasificacións no regulamento que farán involucrarse máis aos atletas en cada unha das seis probas que compoñen o circuíto”. O calendario está formado por 6 carreiras comprendidas entre xaneiro e xuño do 2017, sendo a primeira a Nocturna Monumental o 14 de xaneiro.

Novidades
As categorías individuais do Corre con nós, tanto de menores como de adultos, cambian de nome, pasando a denominarse como se coñecen no ambiente atlético e escolar, respectando as idades de participación que se tiñan dende o principio do circuíto, pero pasando a denominarse Minibenxamín, Benxamín, Alevín, Infantil e Cadete. O resto de categorías serán Xuvenil, Júnior, Promesa, Senior e categorías de Veteranos da A ata a F, de cinco en cinco anos, como ven sendo habitual neste circuíto. Ademais, haberá unha clasificación final individual de menores.

A gran novidade deste ano nas clasificacións individuais vén dada pola clasificación absoluta Larsa do circuíto, que contará cun gañador ou gañadora final do mesmo, podendo ser por primeira vez unha muller, posto que se trata dunha clasificación por xénero compensada en función da idade e distancia das probas, segundo unhas táboas e uns coeficientes que xa están funcionando noutros circuítos. Premiaranse as tres persoas que acaden as primeiras clasificacións cun trofeo e un diploma e os postos do cuarto ao sexto desa clasificación final definitiva. En canto as clasificacións por grupos, haberá unha clasificación final escolar e tamén se creará unha clasificación familiar.

Nesta edición, tamén se contará cunha gran gala final de entrega de premios  deste circuíto, que será unha festa do atletismo popular lucense con moitas sorpresas e actividades durante esta cerimonia. A maiores, tamén haberá un concurso de fotografía relacionado co Corre con nós, do que se irá informando proximamente.

Inscricións
Todas as persoas interesadas en participar na primeira das probas deste circuíto, a Nocturna Monumental, poderán inscribirse ata o 10 de xaneiro a través da web www.championchipnorte.com e consultar o regulamento ou máis información no correo electrónico ccnos@concellodelugo.org ou na web municipal www.lugo.gal.

Máis info

• Regulamento Corre con nós 2017 | Descargar Pdf