Este luns procedeuse ao valado da zona e nos vindeiros días comezarase a executar o desvío e soterrado das redes de servizos afectadas.
A alcaldesa apuntou que “favoreceremos o acceso a pé e en bicicleta ao río desde o centro da cidade, reducindo o uso dos vehículos e, polo tanto, a contaminación”.
Para a execución das obras, enmarcadas na estratexia Muramiñae, habilitarase un desvío provisional, na marxe esquerda da N-VI en sentido A Coruña.
![Lara Méndez supervisa o inicio das obras de renovación e ampliación do paso soterrado baixo a N-VI, que duplicará as súas dimensións Lara Méndez supervisa o inicio das obras de renovación e ampliación do paso soterrado baixo a N-VI, que duplicará as súas dimensións](https://concellodelugo.gal/sites/default/files/styles/large/public/noticias/imagenes/2021/11/inicio_das_obras_de_renovacion_do_paso_soterrado_da_n-vi_1.jpeg?itok=m-SNbHsL)
A alcaldesa de Lugo, Lara Méndez, acompañada do tenente de alcaldesa e concelleiro de Medio Ambiente, Miguel Fernández, supervisou este luns o inicio das obras para a renovación e ampliación do paso subterráneo baixo a estrada Nacional VI e a humanización da súa contorna, que contan cun investimento municipal de 865.000 euros e un prazo de execución de 5 meses.
A rexedora apuntou que “o obxectivo é mellorar as condicións deste itinerario peonil, que será apto tamén para o uso de bicicletas”, o que supón un novo paso na aposta de Méndez por unha cidade máis sostible, verde e accesible.
Neste senso, a alcaldesa subliñou que “esta actuación enlaza con outros proxectos como a construción da nova pasarela peonil, cuxas obras están a piques de rematar, ou a peonalización da Calzada da Ponte, o que axudará a poñer en valor a riqueza natural e patrimonial desta zona da cidade”.
“Así mesmo, buscamos favorecer o acceso á zona do río e ás instalacións e servizos da súa contorna dende o centro da cidade, reducindo o uso dos vehículos particulares e, polo tanto, as emisións de CO2 e a contaminación”, engadiu.
Este mesmo luns levouse a cabo o valado da zona e nos vindeiros días comezarase a executar o desvío e soterrado das redes de servizos afectadas (Begasa, R, Correos e Telefónica), así como o desvío das canalizacións de auga existentes e, posteriormente, executarase un desvío provisional de tráfico.
A continuación procederase a demoler a actual estrutura para executar unha nova, que duplicará as súas dimensións, e incluirá a integración do leito existente. Finalmente, levaranse a cabo os traballos de iluminación, adecuación da senda, sinalización e instalación de mobiliario urbano.
Actuacións a executar
As obras contemplan a demolición do actual paso inferior, feito de formigón, e a execución dunha nova estrutura de paso, cun gálibo horizontal e vertical máis amplos, o que diminuirá o efecto túnel e farao moito máis agradable e seguro para o usuario, con perspectiva de xénero. Neste senso, dobrarase a anchura, pois dos 4,5 metros actuais pasará a 8, e a altura será máis do dobre, pasando dos 2 metros actuais (nos extremos) a 5,3 metros.
Previamente ao inicio dos traballos de demolición do actual paso inferior, habilitarase un desvío provisional da N-VI para non interromper o tráfico. O desvío proxéctase con sección similar á existente, con carrís de 3,50 metros de anchura e beiravías de 1,5 metros, tendo en conta o elevado tráfico da estrada, de máis de 25.000 vehículos diarios. Este desvío realizarase pola marxe esquerda da estrada, sentido A Coruña.
Unha vez liberado o espazo e trala demolición do actual paso, levarase a cabo a execución da nova estrutura. Concluído o novo paso subterráneo, repoñerase a iluminación e servizos na N-VI e tamén se reporá o valado, que se levará a cabo coa mesma tipoloxía de peche que o existente, consistente en malla de simple torsión sobre pés dereitos separados 4 m entre si. Tras a finalización destas obras levarase a cabo a reapertura ao tráfico e o levantamento do desvío provisional, que pode durar entre dous meses e medio e tres.
Adecuación da senda peonil
Por outra banda, o proxecto tamén contempla a adecuación da senda peonil que conecta a explanada situada ao norte da Nacional ata o hostal San Lázaro, con unión a Calzada da Ponte, un itinerario xa existente que, polas súas características actuais, resulta incómodo para os viandantes, especialmente na época de inverno, ao formarse charcos e zonas de barro.
Para evitar este problema e mellorar a comodidade dos usuarios, levarase a cabo a súa pavimentación mediante unha capa de saburra de 20 centímetros, sobre a que se executará unha capa de 5 centímetros de pavimento drenante, adecuado ao tráfico peonil e ciclista, e aceptando o uso ocasional de vehículos. Este pavimento terá acabado en cor ocre ou terra.
O paseo peonil, de 335 metros de lonxitude, terá dous metros de ancho e na zona do terraplén da N-VI contará con murete de 0,5 metros de ancho na marxe dereita, revestido en pedra natural para a súa integración na contorna, para colocación da iluminación e sostemento de terras.
En canto á iluminación, na senda peonil proxéctanse luminarias LED de 50 w sobre báculos de 4,0 m de altura encostados ao carón do camiño e cunha distancia entre os mesmos de 20 metros. Respecto ao paso inferior, cunhas dimensións de 8 x 5 metros e unha lonxitude de só 12 metros, exponse a súa iluminación mediante dous proxectores en disposición cenital centrada, cunha distancia entre eles de 6 metros e equidistantes das saídas.
A renovación e ampliación do paso subterráneo baixo a N-VI enmárcase na estratexia DUSI Muramiñae, da Muralla ao Miño, financiada ao 80% polo Fondo Europeo de Desenvolvemento Rexional (FEDER), e cuxo principal obxectivo é integrar o Miño na cidade, a través da zona do Carme e conseguir, deste xeito, unha cidade máis verde, sostible e moderna.
Audio
- A alcaldesa de Lugo, Lara Méndez, sobre o paso soterrado da N-VI | Descargar mp3