A Concelleira de Cultura, Turismo, Xuventude e Promoción da Lingua, Carmen Basadre, presentou este venres as seis novas actividades gratuítas vinculadas ao mundo do motor e a seguridade viaria, enmarcadas no programa xuvenil +Xtí, que terán lugar dende o 29 de abril ao 16 de setembro, no Polígono do Ceao e no Circuíto de Outeiro de Rei. Trátase de cursos de copilotaxe, impartidos polos irmáns Sergio e Diego Vallejo, cursos de mecánica de competición, actividades sobre seguridade ao volante e condución de todoterreos, dirixidas a mozos e mozas a partir dos 16 anos, para os que a entidade local oferta un centenar de prazas.

Durante a presentación, a Concelleira subliñou a importancia de involucrar aos mozos no concepto de seguridade viaria e de achegalos aos bos hábitos na vía pública.

Todos os interesados en participar nestes cursos poden inscribirse a partir do vindeiro mércores, 13 de abril, a través do teléfono de atención cidadá 010, ou no 982-29-73-50 para chamadas fóra de Lugo. O Concello entregará un premio entre os asistentes ao curso de mecáncia de competicións que consistirá en acompañar ao equipo Vallejo Racing nun rally con todos os gastos pagos.

Máis información sobre datas e horarios na web do Concello www.lugo.gal ou no 010.