A alcaldesa de Lugo, Lara Méndez, e o concelleiro de deportes, Mauricio Repetto, visitaron un dos tres vasos das piscinas climatizados municipais, concretamente o de Frigsa, tras a implantación dun sistema de tratamento de auga mediante luz ultravioleta, que reduce o uso do cloro ata un 75%, “o que, entre outros moitos beneficios, suporá unha mellora para os usuarios e traballadores das instalacións con problemas respiratorios, de pel ou de irritación de ollos, aos que a acción do cloro lles prexudica”, sostivo a rexedora.

Ademais das vantaxes para a saúde, suporá incrementar a eficiencia enerxética, xa que conlevará aforros importantes en renovación de auga e de quecemento da mesma, “co que contribuiremos á mellora medioambiental e minoraremos os custes económicos”, aclarou Lara Méndez, que fixo fincapé en que “tamén nesto damos pasos cara o modelo de cidade sostible e verde na que estamos a traballar, á vangarda na loita contra o cambio climático”.

Con este sistema, no que se investiron 50.658 euros, “na área de Deportes continúamos a mellorar as dotacións municipais co fin de ofrecer aos usuarios unhas instalacións deportivas, neste caso acuáticas, de calidade”, aseverou Mauricio Repetto. O tratamento utílizase tanto nas piscinas de Frigsa como das Pedreiras.

Destacar que o uso deste sistema é máis seguro e san, á vez que mellora o aspecto da auga, sendo esta máis clara e cristalina, diminúe o cheiro a cloro deixando un ambiente fresco e limpo e, “outro aspecto moi importante é que o tratamento por ultavioleta é o sistema máis eficaz que existe no mercado a día de hoxe para a prevención da legionella, dado que o mesmo afecta o ADN das bacterias, de tal forma que non se poden reproducir. Por iso, cun equipo deste tipo, non sería posible que se formasen colonias de legionelosis” finalizaba o edil.