Comezan mañá cun plan de traballo que, ademais de labores de extinción de lumes, inclúe desbroce na zona rural para prevención
O Concello de Lugo vén de contratar a 10 traballadores e traballadoras para as dúas brigadas de prevención e loita contra incendios forestais coas que contará o municipio durante os vindeiros tres meses, ata mediados de outubro. Así o avanzou o Concelleiro de Desenvolvemento Sostible e Persoal, Daniel Piñeiro, quen lembrou que este servizo préstase ao abeiro do convenio de colaboración entre a administración local e autonómica asinado o pasado ano e cunha duración de tres anos, ata o 2018, para a defensa contra o lume.
Cada brigada conta con cinco traballadores: un capataz e catro peóns, que se distribuirán en catro quendas (unha pola mañá, dúas pola tarde e unha pola noite). Comezarán mañá cun plan de traballo que inclúe, ademais das labores de extinción de lumes, desbroce de maleza por toda a zona rural para prevención.
O Concelleiro de Desenvolvemento Sostible e Persoal explicou que o proceso de contratación para dispoñer deste servizo, para o que o Concello achega 40.000 euros, dilatouse porque moitos dos candidatos seleccionados -seis de dez- renunciaron á praza, polo que houbo que ir cubrindo vacantes ata conformar o total da plantilla.
Demora na subvención para os socorristas
Por outra banda, o Concelleiro de Persoal informou de que a Xunta comunicou aínda hoxe ao Concello a concesión dunha subvención de 15.000 euros para a contratación de cinco socorristas durante dous meses.
Daniel Piñeiro lamentou que a resolución da Administración autonómica, que nos últimos anos se producía a finais de xuño para que os socorristas puideran comezar a traballar o 1 de xuño, “se demorase tanto tempo, pois estamos xa a mediados de xullo, o que nos impediu dispoñer antes deste servizo”, pois sen a axuda da Xunta (que custea o salario e a Seguridade Social), o Concello non pode asumir a contratación.
Deste xeito, o edil concretou que, unha vez recibida a comunicación autonómica, procederase de inmediato a contratar ao persoal de socorrismo co fin de que inicien o seu labor no menor tempo posible. Como nos anos anteriores, desenvolverán o seu labor no entorno do Miño.