A Alcaldesa de Lugo, Lara Méndez, anunciou este xoves que o Concello vén de solicitar fondos europeos do programa Interreg - POCTEP (Programa de Cooperación Transfronteiriza España-Portugal) co fin de investir máis de 610.000 euros no estudo, recuperación, posta en valor e difusión a través das TIC do patrimonio da cidade vinculado á enxeñería e á arquitectura da auga, a través dun proxecto denominado Aqua Urbi.

Esta nova iniciativa do Goberno responde ao obxectivo de “seguir potenciando a actividade turística como motor económico da nosa cidade, aproveitando para elo a gran riqueza patrimonial, cultural, gastronómica e medioambiental coa que temos o privilexio de contar”, explicou a rexedora, quen destacou que a afluencia de visitantes a Lugo “medra ano tras ano: Un 9% só dende o 2010; e ata un 92% dende o 2000”, e “cara esa meta traballamos, sobre todo buscando a pernocta, que é o que verdadeiramente xera actividade económica e o punto no que sabemos que temos que centrar os esforzos”.

O Concello de Lugo lidera esta candidatura, á que se presenta con outras entidades asociadas: a Universidade de Santiago, o Concello de Ourense, as cámaras municipais de Braga e Valença do Minho e o Grupo Arqueolóxico Larouco –un colectivo que realizou importantes traballos no xacemento romano de Aquis Querquennis, en Bande (Ourense)-.

Deste xeito, 6 entidades públicas “sumamos esforzos e creamos sinerxias para poñer en valor o noso patrimonio, dinamizar o turismo e crear emprego. Esta, por certo, é a filosofía do Eixo Atlántico do Noroeste Peninsular, en cuxo Comité Executivo participei este pasado martes, unha reunión na que precisamente abordamos a importancia e as oportunidades que ofrecen os fondos europeos para impulsar o crecemento socioeconómico e a cohesión territorial de Galicia e o norte de Portugal, dúas rexións con problemáticas comúns que debemos artellar solucións conxuntas”, asegurou a Alcaldesa.

Liñas de actuación

O proxecto Aqua Urbi contempla catro eixes de actuación: 

1.- A elaboración dun estudo en colaboración coa USC sobre os usos históricos e o patrimonio da cidade vinculado coa auga: abastecemento, saneamento, augas termais e recursos fluviais. Neste senso, faranse intervencións puntuais na zona de captación e nalgúns tramos do acueducto romano encamiñadas a determinar o seu trazado e características técnicas, así como nas antigas termas romanas situadas no actual balneario co fin de completar os estudos que se están a realizar sobre as mesmas. Tamén se catalogarán os elementos máis singulares da arquitectura da auga, como fontes, depósitos hidráulicos, cisternas...

2.- A conservación e posta en valor de todo este patrimonio histórico e arqueolóxico. Levaranse a cabo traballos de restauración e consolidación de bens de interese patrimonial relacionados coa auga, como por exemplo, o acueducto.

3.- A difusión do patrimonio vinculado á auga a través da edición de material divulgativo, visitas guiadas e xornadas de sensibilización, pero sobre todo a través do deseño de ferramentas TIC que faciliten un acceso aos contidos máis dinámico e rápido coa utilización de recursos visuais e interactivos. Neste senso, proponse a activación de Apps, realidade aumentada, 3D, un xeoportal que ofreza a localización xeográfica xunto con información, e tamén materiais informativos para persoas con necesidades especiais. Proxéctase así mesmo a creación dunha ruta transfronteiriza da auga, que discorra polos principais elementos patrimoniais das catro localidades que participamos neste proxecto.

4.- Paralelamente a todo isto, organizaranse obradoiros formativos que doten a persoas desempregadas dos coñecementos e competencias técnicos necesarios para a dixitalización e recuperación do patrimonio co obxectivo de facilitar a súa inserción  laboral.

Deste xeito, “ademais de poñer en valor e difundir o patrimonio para que cada vez máis persoas veñan a Lugo e repitan; crearemos emprego no eido cultural, e acadaremos valor engadido para o sector turístico”, indicou a rexedora.

Financiamento

O orzamento solicitado para executar este proxecto de colaboración a seis bandas ascende a un total de 1,7 millóns de euros, dos que 610.000 estarían destinados á cidade de Lugo: o 75% (458.000€) achegados por Europa, e o 25% restante (152.600€), polo Concello.

A USC contará con 298.921€; o Concello de Ourense, con 239.153€; a cámara municipal de Braga, 329.457€ e a de Valença do Minho, 146.219€; e o Grupo Arqueolóxico Larouco, con 84.254€.

Os prazos

Lara Méndez explicou que o Concello vén de presentar o proxecto Aqua Urbi para captar fondos Interreg, e que o prazo de resolución da convocatoria conclúe en tres meses, polo se coñecerá a decisión sobre o mes de abril.

O prazo de execución do programa é de 3 anos, e de acadalo, as actuacións arrancarán no último trimestre deste 2016. A achega para esta primeira anualidade sería de 80.000€, dos que o Concello aportará 20.000 e Europa os 60.000 restantes.

Modelo de cidade

Co programa Aqua Urbi “damos continuidade ao labor de posta en valor e difusión do patrimonio lucense que o Concello desenvolveu a través de Muralla Dixital -outro programa Interreg-, aínda que neste caso centrámonos nun ámbito específico, como é a enxeñería e a arquitectura vinculadas á auga”, afirmou a rexedora.

Engadiu así mesmo que Aqua Urbi súmase á candidatura ao DUSI, “á que concorremos con Muramiñae: Da Muralla ao Miño; ou á de Cidades Intelixentes; a programas europeos que na actualidade xa temos en marcha, como Lugo+Biodinóamico ou Lucus Mundi, ou que comezaremos nos vindeiros meses, como o convenio coa EOI para ofrecer apoio integral gratuíto a máis de 260 lucenses para lanzar a súa empresa con éxito”.

“Os obxectivos e accións de todas estas iniciativas debuxan o modelo de cidade que queremos para Lugo e que xa estamos a construír: unha cidade verde, acolledora, que combina historia con modernidade, que inviste nas persoas, na creación de emprego, nos servizos sociais e que aproveita a súa riqueza patrimonial, cultural, gastronómica e medioambiental para potenciar o turismo”, destacou a Alcaldesa.

Audio

• Lara Méndez, sobre a presentacion do proxecto Aqua Urbi, |Descargar mp3